Før du sender byggesøknad må du kontrollere om du kan gjere det sjølv. Reglane for søknad utan ansvarsrett følger av byggesaksforskrifta SAK10 § 3-1. Du finn desse reglane her
Skal du bygge garasje, tilbygg eller andre mindre tiltak i LNF-område?
Dersom du vil bygge ein garasje, tilbygg eller andre mindre tiltak i LNF-område må du som regel søke om dispensasjon. Årsaka er at i LNF-område er det berre tillate med tiltak som er meint for gardsbasert næringsverksemd. Om du då har ein bustadeigedom som ligg i LNF, er ikkje garasjen eller tilbygget meint som eit landbrukstiltak.
Om eigedomen er brukt og meint for heilårsbustad, kan du søke om dispensasjon samstundes med byggesøknaden. Det vil vere kurrant å få dispensasjon for bygging av mindre tilbygg og garasje på slike eigedomar. Det er likevel ein føresetnad at det ikkje kjem i konflikt med dyrka mark eller andre landbruksinteresser.
Føresetnader for å søke og bygge utan fagfolk
For å vite kor mykje du kan bygge på din eigedom må du undersøke planstatus for eigedomen. Du må finne ut om det du skal bygge er i samsvar med føresegner i planen som utnyttingsgrad osv. Gjeldande arealplan for din eigedom kan vere kommuneplanen sin arealdel og/eller reguleringsplan for området.
Vi gjer merksam på at du ikkje kan søke om påbygg utan ansvarsrett. Påbygg er byggverk som blir plassert oppå ein bygning, og kan vere til dømes takoppbygg, tak-ark, takterasse, utgraving (underbygging) og liknande.
Kor mykje du kan bygge på din eigedom er avhengig av kva grad av utnytting planar tillet, og kor mykje du har bygd frå før.
Her finn du kva arealplan som gjeld for din eigedom
Dersom det er endringar eller bygging som gjer at du får større byggevolum, må du rekne utnyttingsgrada. For å rekne ut dette må du bruke informasjon som byggeteikningar eller måle opp bygningar og konstruksjon på din eigedom. Reglar for å rekne ut grad av utnytting går fram av regjeringa sin rettleiar.
Avstand til nabogrense
Avstand til nabogrense går fram av plan- og bygningslova eller byggegrenser i arealplan. Dersom ikkje anna er bestemt i plan skal byggverk ha ein avstand frå nabogrensa som minst svarer til halve byggverket si høgde, og ikkje under 4 meter.
Avstanden til grensa vert rekna frå byggverkets fasadeliv.
Nabosamtykke og mindre tiltak
Kommunen kan godkjenne at byggverk blir plassert nærare byggegrensa enn nemnd ovanfor, eller i nabogrensa:
a. Når eigar av naboeigedomen har gjeve skriftleg samtykke eller
b. Ved oppføring av frittliggande garasje, uthus og liknande tiltak inntil 50 m2
Dispensasjon
Dersom byggearbeidet du skal utføre kjem i strid med plan- og bygningslova og tilhøyrande forskrifter eller arealplan, må du søke om dispensasjon. Du kan søke om dispensasjon som ein eigen søknad eller saman med søknad om byggeløyve.
Dispensasjon skal bli nabovarsla, og vi oppmodar at du søker om dispensasjon saman med søknad om løyve dersom det er aktuelt. For å søke om dispensasjon sjå Dispensasjon.
Leidningar eller røyr i grunnen
Du må sjølv sjå til om det er leidningar eller andre røyr i grunnen der du skal bygge. Dette er for å ikkje gjere skade på dei, og hindre tilgangen ved framtidig reparasjon og vedlikehald.